01:30PM
असार २ गते २०८१

बारामा सुन भनेर किनेको धातु पित्तल परेपछि प्रहरीमा जाहेरी

पौष २० गते २०८०
8:08 PM
Author Avatar
आर्थिक मञ्च

काठमाडौं बारा पचरौताका एक व्यवसायीले सुन भनेर किनेको धातु पित्तल परेपछि प्रहरीमा जाहेरी दिएका छन् । पचरौता नगरपालिका ५ बेल्दारी करमवाका ३७ वर्षीय मेराज अंसारीले आफू ठगिएको भन्दै बिहीबार जिल्ला प्रहरी कार्यालय बारामा जाहेरी दिएका हुन् ।

किराना पसलको व्यवसाय गर्दै आएका अंसारीले मंसिर १६ गते चार लाख २५ हजारमा सुन भनेर १०र१० ग्रामको पाँच वटा बिस्कुट खरिद गरेका थिए । सुन भनेर किनेको उक्त बिस्कुट गहना बनाउन खोज्दा पित्तल निस्किएपछि अंसारी न्याय खोज्दै प्रहरी कार्यालय पुगेका हुन् । अंसारीले प्रहरीमा दिएको जाहेरीमा बारागढी गाउँपालिका २ दौरवा बस्ने ४० वर्षीय विनय थारु चौधरीसँग उक्त धातु खरिद गरेको उल्लेख गरेका छन् । थारुले पसलमै आएर आफूसँग १०र१० ग्रामको सुनको पाँच वटा बिस्कुट रहेको र पैसाको खाँचो परेको हुँदा मिलाएर दिने बताएपछि आफूले उक्त धातु खरिद गरेको अंसारीको भनाइ छ । आफ्नो चिनजानका महागढीमाई ९ का राजेन्द्र महतोले थारुसँग आफूलाई भेट गराएको र सोही भेटमा थारुले आफूलाई सुन भनेर उक्त धातु बेचेको जानकारी अंसारीले प्रहरीलाई दिएका छन् । आफू ठगिएको जानकारी पाएपछि अंसारीले चौधरीविरुद्ध ठगी मुद्धा दर्ता गराएका छन् । बाराका प्रहरी उपरीक्षक सुरेशप्रसाद काफ्लेले सुन भनेर पित्तल खरिद गर्न पुगेको विषयलाई लिएर प्रहरीमा उजुरी परेको बताए । प्रहरी उपरीक्षक काफ्लेले उक्त धातु सुनजस्तो नदेखिए पनि जाँचका लागि पठाइने बताए ।सुन भनेर किन्नुभएको रहेछ । उक्त धातु सुन नभएको जानकारी पाएपछि जाहेरी दिनुभएको छु, प्रहरी उपरीक्षक काफ्लेले भने,उक्त धातु सुन जस्तो देखिंदैन । तर पनि हामी जाँचका लागि पठाउछौं । ठगीमा मुछिएका व्यक्तिविरुद्ध अनुसन्धान प्रक्रिया अघि बढाइने काफ्लेले जानकारी दिए । पचरौता नगरपालिका वडा नं। ५ का वडाध्यक्ष लक्ष्मी यादवले किराना पसलको व्यवसाय गरिरहेका सोझो व्यवसायीलाई झुक्याएर ठगी गरेको बताए । यादवले ठगीमा संलग्न व्यक्तिलाई तत्काल नियन्त्रणमा लिएर कानुनी कारवाही अघि बढाउन आग्रह गरेका छन् ।

रिप्लाई गर्नुहोस